2Th 3 | KQC | STEP | Dubuiyaka, uni sina metonari, bi una rofu usa nifa kumo Warika Amiye di ago bi evade urafo rego resi vabara moiyainedi, ya vene yaku ya kaya ya kaya rofu reyo kana.

2 Thessalonians 3

Una rofu usa nifa

1 Dubuiyaka, uni sina metonari, bi una rofu usa nifa kumo Warika Amiye di ago bi evade urafo rego resi vabara moiyainedi, ya vene yaku ya kaya ya kaya rofu reyo kana. 2 Usa ka nifa Sei yaku vegu no vene ma vegu rorobo de rededi vene gutu una moi vegu rigo. Adina amiye tau de yaku Sei rofu mokena vari gira aidedi.

3 Idu Warika Amiye togatoga ini ago ni dodi vegu redo. Adina ina yaku yeiva ya masi amiye no iniye rofu ya moi vegu rigo. 4 Una yaku mokena vari gira Warika Amiye rofu aisifa ma mina ago gira ya rofu niyafa ya yaku reisa bi toga rebigiya.

5 Warika Amiye yaku yi uka di mokena Sei di uka mana ma Keriso di moi yeiva resi toe moi dina veguri ourefeideyaine.

Yi moimai regiya

6 Dubuiyaka, uni Warika Amiye Iesu Keriso di roka dudu ya ago gira nisifa mini, uni dubuiyaka be kaere bi moimai de rena amededi vene ma kaere bi oteimana ago ya rofu maro bi de neidededi kaiba ga refa. 7 Ya kaya diba uni vegu reyafa bi buni, mina kana reyainedi. Una bi duomu de ya sa amegamafa ri. 8 Resi una yaku amiye yokoi di iruku iri tavoi de reyafa. Idu, uru ari kosika de dudu moimai regamafa, una dada ya yokoi yaku fore maku regedi baebu. 9 Makai reyafa bi, una bi vava de ya vene rofu ya nigifa resi una aedeyaganedi bi ide, idu makai regifa ri una vesi uni vegu tari reyaganedi. 10 Ya sa amegamafa ri ya rofu ago gira nigamafa, “Kaere moimai rofu vauya rego bi iruku ga iriyaine.”

11 Makai neidesifa amiye be yi fogori bi duomu dudu amesi moimai de rededi, idu amiye di sina agori besu basu rei tavoi rededi. 12 Warika Amiye Iesu Keriso di roka dudu mina vene rofu ago gira nisi sisiba masifa, vegu rorobo dudu ameibiyagane resi moimai dudu iniye ini vegu baku regedi.

13 Ma dubuiyaka, ya bi vegu buni rena rofu di bi kosika ga refa. 14 Amiye yokoi yaku mina ago fefari ya rofu moi feidesifa de neidego baebu, beika redo vesi ga bofa ina rofu; maena reyainedi. 15 Resi tuma amiye yokoi kana dudu ga dogo refa, idu yi dubuini kana mokena dudu ago buni ni diba mafa.

Ago metonari

16 Warika Amiye iniye, kaere bi uka amuta di adina yaku, uka amuta ya maraine ari neinei ida yokoiyokoi dudu. Warika Amiye bi ya vene tau sa.

17 Na kaya nai vana dudu mina bura reyaka.Na Paul yaku ya yuata nida. Fefa tau bi makai dudu bera imida. Mina bi makai bura reida.

18 Warika Amiye Iesu Keriso di buni toragade bi ya vene tau sa ameibiyaine.